Сагсан бөмбөгийн домогт тоглогч Коби Брайантын ууган охин, 23 настай Наталья Брайант “Victoria’s Secret” брэндийн 2026 оны загварын шоунд анх удаа оролцож, загварын тайзнаа алхлаа.

Тус шоу 2026 оны аравдугаар сарын 18-нд АНУ-ын Калифорни мужийн Лос-Анжелес хотод зохион байгуулагдсан бөгөөд Наталья Брайант “Victoria’s Secret Pink” брэндийн загварыг танилцуулжээ. Тэрбээр хар өнгийн топ, тод ягаан өнгийн гадуур хувцас, чимэглэлтэй жийнсэн өмд болон мөнгөлөг өсгийтэй гутлаар гоёсон байна.

Наталья Брайант энэхүү шоунд оролцох болсондоо маш их баяртай байгаагаа илэрхийлжээ. Тэрбээр багаасаа “Victoria’s Secret”-ийн загварын шоуг үзэж өссөн бөгөөд тайзнаа алхах бэлтгэлээ хангахын тулд өмнөх шоунуудын бичлэгийг давтан үзэж, загвар өмсөгчдийн алхалт, төрхийг судалсан байна.

Тэрбээр өмнө нь 2023 онд Миланы загварын долоо хоногийн үеэр “Versace” брэндийн шоунд оролцож, загварын тайзнаа анх алхаж байжээ. Үүнээс хойш “Boss”, “Off-White” зэрэг брэндийн шоунд оролцож, мөн загварын сурталчилгаануудад ажилласан байна.

Наталья Брайант нь 2020 онд нисдэг тэрэгний ослоор амиа алдсан NBA-ийн домогт тоглогч Коби Брайант болон Ванесса Брайант нарын ууган охин юм. Тэрбээр загварын салбарт өөрийн карьераа үргэлжлүүлэн хөгжүүлж байгаа бөгөөд “Victoria’s Secret”-ийн тайзнаа анх удаа алхсан нь түүний мэргэжлийн замналын нэгэн чухал үйл явдал боллоо.