Австрали даяар сүүлийн өдрүүдэд тэнгэр улаан, улбар шар өнгөөр туяарч, олон нийтийн дунд айдас, гайхшрал төрүүлсэн ховор үзэгдэл ажиглагджээ.

Зарим иргэд уг үзэгдлийг “дэлхийн төгсгөл ирж буй мэт” хэмээн тодорхойлж, зураг, бичлэгээ олон нийтийн сүлжээнд өргөнөөр хуваалцсан байна.

Мэргэжилтнүүдийн тайлбарласнаар энэ нь байгалийн шалтгаантай үзэгдэл бөгөөд голлон их хэмжээний ой, хээрийн түймрийн утаа болон тоосонцор агаар мандалд тархсантай холбоотой аж.

Ялангуяа Шинэ Өмнөд Уэльс болон Викториа мужуудад гарсан түймрийн улмаас нарны гэрэл сарниж, улаан туяа давамгайлан харагдаж байгаа гэнэ.

Цаг уурчдын хэлж буйгаар, агаарт дэгдэх нарийн ширхэгт утаа, үнс нь богино долгионы цэнхэр гэрлийг шингээж, харин урт долгионы улаан, улбар шар өнгийг илүү тодруулдаг байна. Үүний улмаас тэнгэр ердийнхөөс илүү улаан өнгөтэй болж харагддаг аж.

Иргэдийн дунд элдэв цуурхал тархаж байгаа ч шинжээчид энэ нь дэлхийн төгсгөлтэй ямар ч холбоогүй, харин байгаль орчны ноцтой асуудлын нэг илрэл гэдгийг онцолж байна. Түймрийн тархалт, уур амьсгалын өөрчлөлт зэрэг хүчин зүйлс ийм үзэгдлийг ойр ойрхон болгох магадлалтайг мөн анхааруулжээ.