Беларусийн ерөнхийлөгч Александр Лукашенко БНАСАУ-ын удирдагч  Ким Жон Унд автомат буу бэлэглэсэн гэх мэдээлэл олон улсын анхаарлыг татаж байна.

Хэвлэл мэдээллийн хэрэгслүүдийн мэдээлснээр уг бэлэг нь хоёр улсын удирдагчдын харилцааг бэхжүүлэх, цэрэг, аюулгүй байдлын хамтын ажиллагааг илтгэх бэлгэдлийн шинжтэй байж болзошгүй гэж ажиглагчид үзэж байна.

Лукашенко Пёньянд ирснийхээ дараа Кумсусан дурсгалын ордонд зочилж, БНАСАУ-ын удирдагч агсан Ким Ил Сун, Ким Жон Ил нарт хүндэтгэл үзүүлжээ. Мөн хоёр тал “найрамдал, хамтын ажиллагаа”-ны гэрээнд гарын үсэг зурж, харилцаагаа гүнзгийрүүлэхээ илэрхийлсэн байна. 

Беларус болон БНАСА улс орнууд сүүлийн жилүүдэд улс төр, цэрэг, дипломат харилцаагаа ойртуулах хандлагатай байгаа бөгөөд энэ нь олон улсын анхааралд орсоор ирсэн юм.

Шинжээчдийн үзэж буйгаар хэрэв уг мэдээлэл үнэн бол энэ нь бүс нутгийн болон олон улсын аюулгүй байдлын нөхцөл байдалд тодорхой хэмжээнд нөлөөлж болзошгүй юм. Одоогоор талууд уг асуудалд албан ёсны тайлбар хийгээгүй байгаа аж.