АНУ-ын шүүхээс Meta болон YouTube (Google-ийн эзэмшил) компаниудыг хүүхдийн сэтгэцийн эрүүл мэндэд сөргөөр нөлөөлсөн гэж үзэн нийт 6 сая ам.долларын нөхөн төлбөр олгох шийдвэр гаргалаа.

Тус хэрэгт нэхэмжлэгч нь бага наснаасаа сошиал медиа платформуудыг идэвхтэй хэрэглэж ирсэн бөгөөд эдгээр үйлчилгээ нь хэрэглэгчийг аль болох удаан байлгах зорилготой, донтуулах шинжтэй алгоритм, дизайн ашигласан нь сэтгэлзүйн асуудал үүсгэхэд нөлөөлсөн гэж мэдэгдсэн байна.

Шүүхээс гаргасан шийдвэрийн дагуу:
    •    3 сая ам.долларыг шууд нөхөн төлбөрт,
    •    3 сая ам.долларыг шийтгэлийн шинжтэй төлбөрт олгохоор болсон байна.

Шүүхийн дүгнэлтэд платформууд хэрэглэгчийн анхаарлыг татах, удаан барих зорилгоор алгоритмын шийдэл, тасралтгүй контент санал болгодог системийг ашигладаг нь хүүхэд, өсвөр насныханд сөрөг нөлөө үзүүлэх эрсдэлтэй гэж онцолжээ.

Харин Meta болон Google компаниуд уг шийдвэртэй санал нийлэхгүй байгаагаа илэрхийлж, давж заалдах боломжийг судалж байгаагаа мэдэгдсэн байна.

Сүүлийн жилүүдэд АНУ-д сошиал медиа платформууд хүүхэд, өсвөр үеийнхний сэтгэцийн эрүүл мэндэд хэрхэн нөлөөлж буй талаар маргаан нэмэгдэж, үүнтэй холбоотой олон зуун шүүхийн хэрэг үргэлжилж байгаа юм.

Энэхүү шийдвэр нь технологийн компаниудын хариуцлага, сошиал медиа хэрэглээний зохицуулалтын талаархи хэлэлцүүлгийг улам эрчимжүүлэх төлөвтэй байна.