Ардчилсан намаас ерөнхийлөгчийн сонгуульд нэр дэвшигч тодруулах анхан шатны сонгууль Өмнөд Каролина муж улсад бямба гарагт боллоо.  

Санал хураалтын урьдчилсан дүнгээр сонгогчдын 97 хувь нь АНУ-ын одоогийн Ерөнхийлөгч Ж.Байденыг дэмжжээ. Түүний өрсөлдөгчид болох Конгрессын гишүүн Дин Филлипс, зохиолч Марианн Уильямсон нар хоёр хувийн босгыг давж чадаагүй байна.

Намын их хурал наймдугаар сарын 19-22-ны өдрүүдэд Иллинойс муж улсын Чикаго хотод болох бөгөөд Ардчилсан намаас ерөнхийлөгчийн сонгуульд нэр дэвшихийн тулд өрсөлдөгчид их хурлын эхний шатны санал хураалтаар 1968 төлөөлөгчийн саналыг авах ёстой.

АНУ-ын ерөнхийлөгчийн ээлжит сонгууль 11 дүгээр сарын 5-нд болно.