Хатан хааны шинжилгээ эерэг гарсан тухай Букингемийн ордноос мэдэгдэв. Түүнд хөнгөн ханиадтай төстэй шинж тэмдэг илэрч байгаа боловч энэ долоо хоногт Виндзорын шилтгээнээс ажил хэргээ үргэлжлүүлнэ хэмээн ордны мэдэгдэлд дурджээ.

Мөн эмнэлгийн тусламж авч, халдвар хамгааллын дэглэмийг чанд мөрдөх болно гэдгийг онцолжээ.

Түүний том хүү, Их Британий хааны угсаа залгамжлагч Чарльз хоёрдугаар сарын 8-нд ээжтэйгээ уулзсаны дараа шинжилгээ нь эерэг гарсан юм. Мөн Хатан хааны оршин суудаг Виндзорын шилтгээнд хэд хэдэн хүн халдвар авсан нь тодорхой болжээ. 

Өдгөө 95 настай Хатан хаан Элизабет коронавирусийн бүрэн тунд хамрагдсан юм.