Зуны 32 дахь удаагийн Олимпын их наадмын тэмцээн, уралдаанууд 40 гаруй спортын байгууламж, цэнгэлдэх хүрээлэнд болно.

Токио хотын бүсэд Олимпын 33 объект байгаагаас 20 нь Олимпын тосгоноос 8 км дотор байрлаж байна. Бүсчлэлийн хувьд Токио-2020 Олимпын гол гол объектууд “Өвийн бүс” болон “Токиогийн булангийн бүс” гэсэн хоёр үндсэн кластерт төвлөрчээ.

Олимпын тамирчдын хотхон нь дээд тал нь 18 мянга гаруй тамирчид болон зочид төлөөлөгчдийг байрлуулах 21 орон сууц, 3800 кондо хэлбэрийн барилгаас бүрдэнэ. Хотхоны барилгууд 14-18 давхар өндөр бөгөөд 207 тэрбум иен буюу ойролцоогоор 2 тэрбум ам.долларын өртөгтэй аж.

Харин олимпын тамирчдын хотхон долдугаар сарын 13-аас эхлэн зочдоо хүлээн авч эхэлсэн бөгөөд Монгол Улсын Үндэсний шигшээ багийн 43 тамирчин, дасгалжуулагчид болон албаны хүмүүсийн хамтаар Токио хотноо бүрэн бүрэлдэхүүнээрээ хүрэлцэн очоод байгаа юм.