АНУ-ын 46 дахь Ерөнхийлөгчийн тангараг өргөх ёслолын хүрээнд 1-р сарын 17 нд зохион байгуулагдах Хүүхдийн тангараг өргөх ёслолд Никелодеон сувгийн All That шоуны жүжигчин Сэргэлэнцэцэгийн Чингүүн оролцохоор болжээ.

Энэхүү нэр хүндтэй ёслолд С.Чингүүн хүү 74 сая хүүхдийн дуу хоолойг төлөөлж, шууд нэвтрүүлэгт зочноор оролцож үг хэлэх юм.

Тэрбээр өнгөрсөн арванхоёрдугаар сард Nickelodeon, Time for Kids болон Time сэтгүүлийн хамтран зохион байгуулсан 2021 оны “Дэлхийн оны шилдэг хүүхэд шалгаруулах" /"Kid of the year"/ телевизийн тусгай нэвтрүүлэгт шүүгчээр оролцсон юм. 

Тэрбээр өөрийн фэйсбүүк хуудаснаа “Үндэсний хүүхдийн тангараг өргөх ёслол" энэ онцгой үйл ажиллагаанд оролцохдоо маш их догдолж байна. Youtube болон Facebook  дэх National Children's Campaign  хуудсаар 15:00 цагаас шууд үзээрэй хэмээн сэтгэгдлээ хуваалцжээ.

С.Чингүүн АНУ-ын Чикаго хотод төрж, өссөн. Есөн настайгаасаа эхлэн мэргэжлийн түвшинд жүжигчний мэргэжлээр хичээллэж, Чикаго хотынхоо нэр хүндтэй агентлагтай албан ёсны гэрээтэй ажиллаж эхэлсэн аж.

Дашрамд сонирхуулахад, С.Чингүүний эмээ,Чикагод суугаа Б.Цэнджав хилийн цэргийн ажилтан, өвөө Ч.Төмөрбаатар хилийн цэргийн хошууч юм.

С.Чингүүний Фэйсбүүк хуудас: Chinguun Sergelen