Мягмар гарагийн байдлаар АНУ-д нас барсан өвчтөний тоо нийтдээ 3,721 хүрсэн бол Хятадын эх газарт бүртгэгдсэн эндэгдлийн албан ёсны тоо 3,305 байна. Ингэснээр АНУ-д өвчний эндэгдлийн тоо Хятад улсын тооноос ИЛҮҮ ГАРЛАА.

Тус эндэгдлийн 1,550 тохиолдол нь АНУ-ын тахлын хамгийн том голомт болсон Нью Йорк мужид гарсан байна.

Трампын засаг захиргааны топ халдварын мэргэжилтэн, доктор Энтони Фаучи өчигдөр CNN сувагт ярихдаа хөл хорионы дэглэмийн үр дүн түрүүчээсээ ажиглагдаж эхэлснийг мэдээлсэн байна. Тэрбээр “Бидэнд дэглэмийн үр дүн гарч байгаа эхний шинж тэмдэг ажиглагдаж эхэлсэн. Гэхдээ энэ нь асуудлыг хөнгөрүүлэх шалтгаан болохгүй. Халдварын тохиолдлууд ойрын үед өсөх нь тодорхой” гэжээ.

АНУ-ын ерөнхийлөгч Дональд Трамп өчигдөр Цагаан ордонд мэдэгдэл хийхдээ “Америк хүн бүрт хамгийн хүнд хэцүү өдрүүдэд бэлэн байхыг би уриалж байна. Бид маш хэцүү хоёр долоо хоногийг хамтдаа туулах болно” гэж анхааруулсан байна.