АНУ-ын Холбооны нөөцийн сангийн тэргүүн Жером Пауэлл

АНУ-ын Холбооны нөөцийн сан коронавирусний халдвар тархсантай холбоотойгоор гуравдугаар сарын 16-наас эхлэн бодлогын хүүгээ 0.25 хувьд хүргэж бууруулснаа мэдэгджээ.

Уг арга хэмжээ нь Их Британи, Япон, Европын Холбоо, Канад, Швейцарийн төв банкнуудтай хамтран хэрэгжүүлэх ажлын нэг хэсэг юм байна.

Холбооны нөөцийн сан бодлогын хүүгээ өмнө нь гуравдугаар сарын 3-нд 1.5-1.75 хувиас 1-1.25 хувьд хүргэж бууруулж байв.

“Ийм үед айл өрхөөс эхлээд аж ахуйн нэгжүүдийн зээлийн эрэлт хэрэгцээг хангахад туслахын тулд “хөнгөлөлтийн цонх” ашиглахыг ХНС зээл олгогч байгууллагуудад уриалж байна” гэж тус сангийн цахим хуудсанд нийтлэгдсэн мэдэгдэлд дурджээ. Коронавирусний дэгдэлт олон улс орны, тэр дундаа АНУ-ын эдийн засагт ноцтой хохирол учрууллаа. Цар тахал эдийн засгийн үйл ажиллагаа болон эдийн засгийн төлөв байдалд нөлөөлсөөр байх болно гэж мэдэгдэлд тэмдэглэсэн байна.

Шийдвэрийг зарласны дараа АНУ-ын ерөнхийлөгч Дональд Трамп авсан арга хэмжээнд сэтгэл хангалуун байгаагаа мэдэгджээ. Энэ бол манай орны хувьд үнэхээр гайхамшигтай зүйл юм” гэж тэрбээр хэвлэлийн бага хурал дээр хэлсэн байна.