“McDonalds”-ийн Гүйцэтгэх захирал Стив Истербрук дотоод журмаа зөрчиж, ажилтантайгаа дотно харилцаа үүсгэсэн хэргээр албан тушаалаас нь чөлөөллөө.

Өнгөрсөн баасан гарагт тус компанийн Төлөөлөн удирдах зөвлөл хийсэн шалгалтын дүнд үндэслэн санал хураалт явуулж энэ шийдвэрийг гаргасан байна.

“McDonalds” компанийн дотоод журамд Гүйцэтгэх захирал өөрийн компанийн ажилтантай дотно харилцаа үүсгэхийг хориглосон заалт байгаа ажээ.

Тус компани шинэ Гүйцэтгэх захирлаар Крис Кемпзинскийг томиллоо.

Энэ талаар Стив Истербрук “Энэ бол алдаа байсан, компанийн үнэ цэнийг хадгалахын тулд би ТУЗ-ийн шийдвэрийг хүлээн зөвшөөрч, албан тушаалаа өгөх болсон” хэмээн бичсэнийг хэвлэлүүд нийтэлжээ.