Хонконгийн жагсагчид ням гарагт нисэх онгоцны буудал хүрэх замыг хааж, Азийн томоохон тээврийн төвийн үйл ажиллагааг тасалдуулав.
Тодруулбал, нисэх буудал руу явдаг метроны хөдөлгөөн бүрэн зогсож, автозамууд хаагдсан байна. Зорчигчид аргагүйн эрхэнд нисэх терминал руу явган хүрч очиж байв.

Хонконгийн онгоцны буудлаас хөөрөх ихэнх нислэг хэвийн явагдсан ч зорчигчид хоцорч саатсан тухай мэдээлж байна.

Ням гарагт хар хувцастай мянга мянган жагсагч онгоцны буудалд нэвтрэхийг оролдсон ч цагдаа нар зогсоожээ. 

Хонконгийн эсэргүүцлийн хөдөлгөөн 15 дахь долоо хоногтоо үргэлжилж байна.