АНУ-ын Ерөнхийлөгч Дональд Трампын хадам аав ээж охиныхоо дэмжлэгтэйгээр АНУ-ын иргэншил албан ёсоор авсан байна.

“АНУ-ын тэргүүн хатагтай Мелани Трампын эцэг эх Виктор, Амалия Кнавс нар өчигдөр АНУ-ын иргэншил авсан. Тэд үүндээ маш их баяртай байгаа” гэж тэдний өмгөөлөгч Майкл Уайлдс мэдэгдлээ.

Харин тэргүүн хатагтайн ажлын алба уг асуудлаар тайлбар өгөхөөс татгалзсан байна.

Словени гаралтай Виктор, Амалия Кнавс нар нь ногоон картаар АНУ-д амьдарч байсан ажээ. Тэдэнтэй ойрын холбоотой эх сурвалжийн мэдээлснээр, тэд Мелани Трампын дэмжлэгтэйгээр ногоон карт авснаар АНУ-д ажиллаж амьдрах эрх нь нээгдэж, улмаар тус улсын иргэншил авах зам нь тавигдсан байна.

Гэвч гэр бүлийн визний ийм төрөл нь АНУ-д сөрөг нөлөөтэй гэж Д.Трампын Засаг захиргаа үзэн, хүчингүй болгох зорилготой байгаа билээ.

Өмгөөлөгч Майкл Уайлдс “CNN”-д ярилцлага өгөхдөө, тэргүүн хатагтайн эцэг эх ногоон карт болон иргэний харьяаллаа хэрхэн авсан талаар тайлбар өгөхөөс татгалзаж, Д.Трампын Засаг захиргааны цагаачлалын бодлогыг буруушаасан байна. Би гэр бүлүүдийг нэгтгэх зарчмыг баримталдаг бөгөөд энэ нь цагаачлалын бодлогын үндэс суурь юм гэж тэрбээр мэдэгдэв.