“Facebook” компани хэрэглэгчдийн мэдээлэл алдагдсан байж болзошгүй Канадын нэг компанийн эсрэг арга хэмжээ авсан байна. Канадын дижитал зар сурталчилгааны “AggregateIQ” компани хэрэглэгчдийн мэдээлэлд хууль бусаар нэвтэрсэн байж болзошгүй байгааг “Facebook” компани мэдэгдлээ. Улмаар тус компанийн “Facebook”-ийн сүлжээнд нэвтрэх эрхийг хязгаарласан байна. “AggregateIQ” компани британичууд Европын Холбооноос гарах санаачилгыг сурталчлах ажилд гол үүрэг гүйцэтгэсэн гэгдэж байгаа аж. Тус компанид BREXIT-ийн “Vote Leave” кампанит ажлын баг 2016 онд олон нийтийн санал асуулга болохоос өмнө 3.8 сая ам.долларын төлбөр төлжээ. “Facebook”-ийн зүгээс “AggregateIQ” компанийг “Cambridge Analytica”-ийн толгой компани болох “SCL”-тэй холбоотой байж магадгүй гэж таамагласан байна. Хэдий тийм боловч “AggregateIQ” эдгээр компаниудтай холбоогүй, мөн “Facebook”-ийн хэрэглэгчдийн мэдээлэлд нэвтрээгүй гэсэн тайлбар өгчээ.