БНХАУ-ын дарга Ши Жиньпин Францын Ерөнхийлөгч Эммануэль Макроныг даваа гарагийн орой буюу өчигдөр орой хүлээн авч уулзжээ.
Энэ үеэр  Ши Жиньпин хэлэхдээ “Мао Зэдун дарга, Францын генерал Шарль де Голль нар 1964 онд хоёр улсын хооронд дипломат харилцаа тогтоох түүхэн шийдвэр гаргасан. Тэдний энэ шийдвэр нь тухайн үеийн дэлхийн хэв маягийг өөрчлөөд зогсохгүй дэлхийн өнөөгийн хөгжилд чухал нөлөө үзүүлсэн. Шинэ эринд бид Хятад-Францын харилцааны гэрэлт ирээдүйн төлөө түүхэн харилцаагаа эрхэмлэж, зөв замаар явах хэрэгтэй” гэжээ. Мөн “Бүс ба Зам” санаачлагын хүрээнд Франц улстай хамтын ажиллагаагаа улам бүр бэхжүүлэхэд Хятад улс хэзээд бэлэн байна" гэжээ.

Харин Францын Ерөнхийлөгч Э.Макрон “Бүс ба Зам” санаачлагын хүрээн дэх төслүүдийг хэрэгжүүлэхэд идэвхтэй оролцоно гэдгээ илэрхийлэхийн сацуу “Олон улсын өмнө тулгамдсан асуудлууд, тухайлбал уур амьсгалын өөрчлөлттэй тэмцэхийн тулд манай хоёр улс хамтран ажиллах нь чухал” гэжээ.

Францын Ерөнхийлөгч Э.Макрон нь гурван өдрийн төрийн айлчлалаар Хятад улсад өчигдөр хүрэлцэн очсон юм. Тэрбээр Хятадын баруун хойд нутгийн Шэньси мужийн төв Си-ань хотод хагас өдөр саатсаныхаа дараа өчигдөр үдээс хойш Бээжинд хүрэлцэн очсон байна.