Өчигдөр нэгж биткойны үнэ 19771 ам. доллар хүрч, биткойныг бүтээгч/бүтээгчдийн нийт хөрөнгийн хэмжээ Форбесын жагсаалтаар жишээлж үзвэл дэлхийд 44 дүгээрт орохоор их хэмжээнд хүрчээ. Гэхдээ өнөөдрийг хүртэл хэн үүнийг бүтээсэн болохыг бид мэдэж чадаагүй л байна.

Өнгөрсөн жилүүдэд хэд хэдэн хүнийг “Сатоши Накамото” хэмээх нэрний ард нуугдаж байсан хэмээх таамаг гарч байсан бөгөөд Майкл Клийр, Финляндын тоглоом хөгжүүлэгч Вили Ледонвирта болон өөр бүлэг хүмүүс ч байсан байж магадгүй гэж үзэж байв.

Эсвэл 2015 оны арван хоёрдугаар сард Австралийн цагдаа нар гэрт  нь дайран орсон Крейг Стивен Урайт ч байж магадгүй. Wired болон Gizmodo-ийн дэлгэсэн мэдээллүүд дунд Урайтыг биткойныг бүтээсэн байж болох хэд хэдэн баримт байсан юм.

Гэхдээ Урайт өөрийгөө жинхэнэ биткойныг бүтээсэн гэдгээ баталж чадаагүй учраас эрэл мухарджээ. Өнөөдөр биткойныг бүтээсэн хэн нэгний дансанд 980 мянган ширхэг биткойн байгаа бөгөөд одоогийн ханшаар тооцож үзвэл 19,4 тэрбум ам. доллартой тэнцэнэ.

Хэрвээ нэгж биткойны үнэ 88 мянган ам. долларт хүрвэл Сатоши Накамотогийн хөрөнгө Билл Гейтсийг давах бөгөөд харин нэг сая ам. доллароос давсан тохиолдолд нөхөр Сатоши дэлхийн анхны ИХ НАЯД хөрөнгөтэй этгээд болох юм.