Жил бүрийн 11 дүгээр сарын 25-нд "Махгүй хоолны олон улсын өдөр" тохиодог. Энэ өдөр дэлхийн сая сая иргэн амьтны амь хөнөөхгүй байж, махан зоогоос татгалзах хөдөлгөөнийг өрнүүлдэг уламжлалтай.

“Махгүй хоолны олон улсын өдөр”–ийг Энэтхэгийн иргэн философич, оюун санааны удирдагч, сурган хүмүүжүүлэгч, хамаг амьтны тусын тулд амь хороохыг тэвчих талаар сургааль номлогч САДУ ВАСВАНИ-гийн дурсгалд зориулан түүний төрсөн өдөр болох 11 дүгээр сарын 25-ны өдөр тэмдэглэдэг болжээ.

Энэ хөдөлгөөн нь 1986 онд Энэтхэгт эхэлсэн бөгөөд 2002 оноос “Аливаа амь таслахаас татгалзах” холбооноос эрхлэн дэлхий даяар зохион байгуулах болжээ.

Энэ өдрийг мах зооглохгүй өнгөрөөснөөр “Би нэг өдрийг мах идэхгүй байж чадаж байгаа юм чинь олон хоног, цаашлаад насан туршдаа махан хоолноос татгалзаж чадах юм биш үү” гэсэн бодол хүн бүрт төрөх юм. Дэлхийн хүмүүс зөвхөн нэг өдөр махан зоог барихгүй байснаар олон амьтны амийг аварч чадна.