Олон улсын эрэн сурвалжлах сэтгүүлзүйн нийгэмлэгээс Панамын хуулийн фирмийн оффшор дансны мэдээллийг бүрэн эхээр нь дэлхий нийтэд зарласан. Дээрх мэдээлэлд нийт 215 мянган оффшор компани, улс орны удирдагч, нөлөө бүхий улстөрчид татвараас зайлсхийж, мөнгө угаасан баримт нотолгоо бүхий 11.5 сая нууц баримтууд багтсан юм. Эдгээр баримтууд нийтэд ил болсонтой холбогдуулан гадаадын улс орнууд оффшор данстай иргэд албан тушаалтнуудыг шалгаж эхлээд байна.

Өнөөдрийн байдлаар, АНУ, Франц, Испани, Австри, Австрали, Энэтхэг, Бельги зэрэг улсууд оффшор данстай улстөрч, албан тушаалтан, байгууллагуудтай хариуцлага тооцохоо мэдэгдээд байна. Тухайлбал нэрт хөлбөмбөгчин Леональ Мессид Испанийн прокурор татвараас зайлсхийсэн хэмээн эрүүгийн хэрэг үүсгэн шалгаж, хэргийг шүүхэд шилжүүлээд байгаа аж. Харин өнгөрөгч шөнөөс эхлэн Япон улс нууц данстай иргэд албан тушаалтнуудаас байцаалт авч эхэлсэн ба зарим иргэдийг цагдан хорьсон тухай тус улсын хэвлэлээр мэдээлж байна. Мөн БНХАУ оффшор данстай иргэн албан тушаалтнуудыг шалгана гэдгээ албан ёсоор мэдэгдсэн байна.