Эм, эмийн бүтээгдэхүүн үйлдвэрлэгч АНУ-ын “Pfizer” компани Дублинд төвтэй үрчлээний эсрэг бүтээгдэхүүн үйлдвэрлэгч “Allergan”-тай нэгдэх 160 тэрбум ам.долларын хэлцлээ албан ёсоор зогсоохоор болсноо мэдээлсэн байна. Үүнээс өмнө хоёр тал АНУ-ын Сангийн яамны шинэ хуулийн өөрчлөлттэй холбогдуулан хэлцлийг үргэлжлүүлэх боломжийг эрэлхийлж байгаа гэсэн мэдээлэл гараад байсан юм. АНУ-ын компаниуд хилийн чанад дахь жижиг фирмтэй нэгдэх замаар оффшор бүсэд бага татвар төлөх нөхцөлийг бүрдүүлэхээр зорих болсон аж. Энэхүү алхмыг хязгаарлах зорилгоор АНУ-ын Сангийн яам шинэ хуулийн төсөл боловсруулж, хэлэлцүүлгийг нь ид өрнүүлж байна. Хэрэв дээрх төсөл батлагдвал “Pfizer” болон “Allergan”-ийн хэлцэл зогсохоос өөр аргагүй байжээ. "Allergan-ийн хувьд үүнд бэлтгэлтэй байсан. Бид цаашдаа өөр хөрөнгө оруулалт хайх болно" гэж тус компанийн Гүйцэтгэх захирал Брэнт Саундерс мэдээлсэн юм. Харин “Pfizer”-ийн хувьд энэ он дуусахаас өмнө компаниа хуваахаар төлөвлөж байгаа ажээ. Энэ нь "Allergan”-тай хийхээр төлөвлөж байсан шиг ийм хэлцлийг дахин хийхгүй" гэдгийг нь харуулж байна гэж шинжээчид дүгнэжээ. Дээрх хоёр компанийн хувьд хэлцэл нь бүтэлгүйтсэнд АНУ-ын Сангийн яамыг буруутгаж байгаа гэдгээ албан ёсны мэдэгдэлдээ дурдсан байна. Мөн АНУ-ын Сангийн яамнаас танилцуулсан шинэ журмыг эсэргүүцэж хуулийн маргаан өрнүүлсэн тохиолдолд энэ нь хэт өндөр зардал шаардах байсан учраас энэ хувилбараас татгалзсан гэдгийг онцолжээ.