Германы аж үйлдвэрийн гарц 11 дүгээр сард 1.5 хувиар өсч, хоёр дахь сардаа өсөлтийн бүсэд хадгалагдлаа.

Ийнхүү шинжээчдийн таамгаас давсан сайн дүн үзүүлэхэд дотоодын эрэлт өндөр байсан нь голчлон нөлөөлснийг тус улсын Статитистикийн хорооноос мэдээлсэн байна. Европын хамгийн том эдийн засагт тооцогддог Герман улс экспорт ялангуяа БНХАУ-тай хийх худалдаанаас ихээхэн хамааралтай байдаг.

Харин өнгөрсөн оноос хойш эдийн засаг нь дотоодын хэрэглээнд шилжиж эхэлснийг үйлдвэрлэлийн салбарын үзүүлэлт дахин баталж байна. Үүний зэрэгцээ Германы жижиглэн худалдааны борлуулалт 11 дүгээр сард 0.2 хувиар өссөн үзүүлэлттэй гарлаа.

Энэ нь өмнөх сард нь 0.1 хувиар агшсантай харьцуулахад сайн дүн болж байгаа юм. Ийнхүү жижиглэн худалдаа өсөхөд хөдөлмөр эрхлэлтийн түвшин өндөр байгааг дагаад хэрэглээний зарцуулалт нэмэгдсэн нь нөлөөлсөн гэж мэргэжилтнүүд үзэж байна.