Саудын Арабын эрх баригчид шийт шашны санваартан, аятолла Нимр аль-Нимрийг цаазалсны дараа бүс нутагт шашин хоорондын дайн, мөргөлдөөн дэгдэж магадгүй болоод байна. Тэр тусмаа Иран улс шийт шашны нэртэй зүтгэлтнийг цаазалсныг эрс эсэргүүцэж байгаа аж. Тегеран хотод Эр-Риядын шийдвэрийг эсэргүүцсэн хүмүүс Саудын Арабын Элчин сайдын яамны байр руу дайрч оржээ. Жагсагчид дипломат төлөөлөгчийн газрын газар нутаг руу нэвтэрч тавилга, эд хогшлыг нь эвдэж, гал түймэр тавих гэж оролджээ. Цагдаа нар уурласан иргэдийг Элчин сайдын яамнаас гаргаж, гал сөнөөгчид түймрийг унтраасан байна. Ираны Гадаад хэргийн яам иргэдээ тайвшрахыг уриалж, дипломат төлөө­лөгчийн газрын статусыг хүндэтгэхийг хүсчээ.

Мешхед хот дахь Саудын Арабын консулын газар мөн хилэгнэгчдийн довтолгоонд өртсөн мэдээ ирж байна. Иран иргэд шатаж, дэлбэрэх материалыг барилга руу шидэж консулын газрыг шатаах гэж оролджээ. Зарим идэвхтэн консулын газрын хашаа руу нэвтрэн орж Саудын Арабын далбааг буулгах гэж байсныг таслан зогсоосон аж. Саудын Арабт тер­ро­­ризмын хэргээр 47 хүнийг бу­руут­гаж цаазал­­сан юм. Тэдний дунд Саудын Арабын харъяат, шийт шашны нэр­тэй санваартан, улс төрийн зүтгэлтэн Нимр аль-Нимр байсан. Тэрээр 2011 онд Эр-Риядын эсрэг ардчилсан эсэргүүцлийн хөдөлгөөнийг удирдаж, шийт шашинтнуудыг хав­чин гадуурхаж байгааг эсэр­гүүцэн тэмцэж байсан ажээ. 2014 оны аравдугаар сард түүнд цаазаар авах ял оноожээ.

Саудын Арабт шийт шашны нөлөө бүхий зүт­гэлтнийг цаазалсан нь бүс нутагт шашин хоорондын мөргөлдөөн, хурцадмал байдлыг нэмэг­дүүлж магадгүй хэ­мээн АНУ-ын Төрийн депар­таментын хэв­лэлийн төлөөлөгч Жон Кирби мэдэгдлээ. “Ойрхи Дорнод дахь шашин хоо­рондын хурцадмал байд­лыг намжаах хэрэгтэй үед ийм явдал болсон нь бид­ний сэтгэлийг зовоож байна” хэмээн тэ­рээр онцолжээ. Бүс нутгийн улс орны лидерүүд мөргөлдөөнийг нам­жаахад чиглэсэн хүчин чармайлтаа нэмэг­дүү­лэхийг АНУ уриалж байна. Европын холбооны гадаад бодлогын төлөөлөгч Федерика Могерини “Шийт шашны нэртэй зүтгэлтнийг цаазалсан нь аюултай үр дагавар авчирч магадгүй” хэмээн анхааруулжээ.

Эх сурвалж: “Зууны мэдээ” сонин