Энэтхэгийн Ерөнхий сайд Нарендра Моди ОХУ-ын Ерөнхийлөгч Владимир Путинтэй оройн зоог барьж, хоёр орны ирээдүйн харилцааг зөвлөлдлөө.

Жил бүрийн ОХУ-Энэтхэгийн чуулганыг тохиолдуулсан хоёр хоногийн айлчлалын хүрээнд Нарендра Моди томоохон бизнес эрхлэгчидтэй уулзах товтой байгаа юм. Энэ удаагийн айлчлалаар цөмийн эрчим хүч, батлан хамгаалахын хамтын ажиллагаа, ялангуяа ОХУ-аас зэвсэг худалдаж авах асуудлаар голлон хэлэлцэх юм.

Мөн газрын тос, нүүрсний нийлүүлэлтийн асуудлаар зөвлөлдөж, нийт 7 тэрбум шахам ам.долларын хэлэлцээр байгуулах хүлээлттэй байна. Тухайлбал ОХУ-ын зэвсэг, тээврийн хэрэгсэл үйлдвэрлэгч “Kamov” компани Энэтхэгийн түнштэй хамтарч “Ka-226T” нисдэг тэрэг үйлдвэрлэх нэг тэрбум ам.долларын хэлэлцээр байгуулах төлөвтэй байгаа юм.

Мөн Энэтхэгийн тал ОХУ-аас цөмийн хөдөлгүүрт байлдааны шумбагч, шинэ гурван усан онгоц худалдаж авах тохиролцоонд хүрэх хүлээлттэй байна. Айлчлалын өмнөхөн Энэтхэгийн зэвсэгт хүчин ОХУ-ын агаарын довтолгооноос хамгаалах систем “S-400”-ийг худалдаж авах 4.5 тэрбум орчим ам.долларын гэрээг баталгаажуулсан юм.

Энэтхэгийн Батлан хамгаалах яамны мэдээлснээр зэвсэгт хүчний хэрэгслээ сайжруулах ажилд нийт 150 тэрбум ам.доллар зарцуулах төлөвлөгөөтэй байна.