Туркийн Истамбул хотын Байрампаша метроны буудлын ойролцоох гүүрэн гарц дээр гар хийцийн тэсрэх бөмбөг дэлбэрснээс таван хүн гэмтсэн байна. Түүнчлэн халдлагын улмаас нэг хүн амь үрэгдсэн тухай Туркийн хэвлэлд мэдээлжээ.  Халдлагын дараа зарим галт тэрэгний үйл ажиллагааг зогсоож, аюулгүй байдлыг чангатгасан байна.

Өмнө нь өнгөрсөн аравдугаар сард Туркийн нийслэл Анкарад хоёр амиа золиослогч тэсрэх бөмбөг дэлбэлснээс 100 гаруй хүн амь үрэгдсэн юм. Түүнчлэн өнгөрсөн долдугаар сард Сирийн хилийн ойролцоох Туркийн жижиг хотод амиа золиослох халдлага гарч 33 хүн амь үрэгдсэн байв.