ӨнөөдөрШоппинг хийж үзмээр дэлхийн хамгийн “том - 10” их дэлгүүр
2014 оны 11 сарын 17
Худалдааны төв гэдэг зөвхөн худалдан авалт хийчихээд л гардаг газар байсан цаг үеэ өнгөрөөжээ. Энэ ч утгаараа дэлхийн томоохон молл, худалдааны төвүүдэд шоппинг хийнгээ алжаалаа тайлж, амарч цэнгэх бүхий л тааламжтай орчныг бүрдүүлсэн байдаг.
Ингээд та бүхэндээ барилгынхаа нийт талбайн хэмжээгээр дэлхийн хамгийн томд тооцогддог төдийгүй та бидний хэрэгцээ шаардлагыг жинхэнэ утгаар нь биелүүлэхүйц хамгийн том 10 их дэлгүүрийг танилцуулж байна. Эрхэм та эдгээр дэлгүүрээс аялалынхаа маршрутдаа нэмэхээ мартуузай.
№10. SM MEGAMALL / 506.435 М.КВ
- Хаана байдаг: Мандалуонг / Филиппин
- Хэзээ нээгдсэн: 1991
- Дэлгүүрийн тоо: 1000+
Хятад гаралтай Филиппин бизнесмен Хенри Сигийн удирддаг “The SM Prime Holdings”-ийн сүлжээ их дэлгүүрүүдийн нэг болох “The SM Megamall” нь Филиппиний Метро Манила бизнес дүүрэгт байдаг. Гаднаа 4200 гаруй машины зогсоолтой Филиппиний томоохон их дэлгүүрээр өдөрт 800.000 гаруй, нэг жилд 292.000.000 гаруй хүн үйлчлүүлдэг. Их дэлгүүр нь нэг дор 4.000.000 хүнийг багтаах талбайтай бөгөөд “IMAX” театр, тоглоомын төв, зоогийн газар, супермаркет гэх мэтчилэн хүний бүхий л хэрэгцээг нэг дор цогцлоожээ.
№9. THE CENTRAL WORLD / 550.000 М.КВ
- Хаана байдаг: Бангкок / Тайланд
- Хэзээ нээгдсэн: 1990
- Дэлгүүрийн тоо: 600+
Тайландын томоохон их дэлгүүрүүдийг эзэмшдэг “The Central Pattana” нь 1947 онд байгуулагдсан “The Central Group” - ийн охин компаниудын нэг юм. “The Central World” нь 8.000.000 гаруй хүн амтай нийслэл Бангкок хотноо байдаг томоохон их дэлгүүр бөгөөд “Дэлхийн худалдааны төв” нэртэйгээр 1990 онд нээж байжээ.
№8. THE GOLDEN RESOURCES MALL / 557.419 М.КВ
- Хаана байдаг: Бээжин / БНХАУ
- Хэзээ нээгдсэн: 2004
- Дэлгүүрийн тоо: 1000+
АНУ-ын “The Mall of America” - гаас 1.5 дахин том гэгддэг “Jin Yuan” их дэлгүүрийг 2004 онд нээжээ. Барилгын ажлыг нь 20 гаруй сарын хугацаанд гүйцэтгэсэн бөгөөд 2004 - 2005 онд дэлхийн №1 хамгийн том их дэлгүүрээр нэрлэгдэж байсан юм. Их дэлгүүрт түрээсээр үйл ажиллагаагаа явуулдаг 1000 гаруй дэлгүүр байдаг бөгөөд эдгээрээр орж үзэхэд хамгийн багадаа хоёр бүтэн өдрийг зарцуулдаг ажээ. Сонирхуулахад дэлгүүрт 230 цахилгаан шат байдаг гэнэ.
№7. CENTRO SANTA FE / 562.501 М.КВ
- Хаана байдаг: Мексик хот / Мексик
- Хэзээ нээгдсэн: 1993
- Дэлгүүрийн тоо: 300+
Латин Америкийн хамгийн том их дэлгүүрээр нэрлэгддэг “The Centro Santa Fe” нь худалдааны төвөөс гадна кино театр, 450 өрөө бүхий зочид буудал, ажлын байрыг түрээслүүлдэг байна. “H&M” брэнд Мексикт анхны салбараа нээсэн нь “The Centro Santa Fe” их дэлгүүрт болсон бөгөөд жилд 20.000.000. гаруй хүний хөл тасардаггүй ажээ.
№6. ISFAHAN CITY CENTER / 600.000 М.КВ
- Хаана байдаг: Исфахан / Иран
- Хэзээ нээгдсэн: 2012
- Дэлгүүрийн тоо: 770+
Галт тэрэг болон нисэх онгоцны буудалтайгаа ойр байрладгаараа хөл хөдөлгөөн ихтэй Ираны “The Isfahan City Center” - ийн барилга, архитектурыг “Prestige Land Iran Co.” компани гүйцэтгэжээ. Дэлхийн олонх орны томоохон худалдааны төвд кино театр, аквариум, урлан зэргийг шийдэж өгсөн байдгийн адилаар энд музейнээс эхлээд онгоцны билетийн касс, таван одтой зочид буудал, кино театр, зоогийн газар, хайпермаркет, банк санхүүгийн байгууллагуудын салбарууд байрладаг юм. Долоон давхар энэхүү худалдааны цогцолбор нь гаднаа 5000 машины зогсоолтой гэнэ.
№5. THE COSTANERA CENTER / 700.000 М.КВ
- Хаана байдаг: Сантиаго / Чили
- Хэзээ нээгдсэн: 2012
- Дэлгүүрийн тоо: 330+
Чилийн Сантиаго хотноо тэнгэр баганадсан өндөр дөрвөн барилгын бүтээн байгуулалт явагдаж байгаагийн нэг нь 2012 онд нээлтээ хийсэн “The Costanera Center” юм. Эдгээр дөрвөн барилга нь их дэлгүүр, зочид буудал, ажлын байрны зориулалттай байх агаад “The Cencosud” компаний өмч юм. Энэ их дэлгүүрт “Zara”, “Guess”, “Hugo Boss”, “H&M” зэрэг дэлхийд нэртэй брэндүүд салбар дэлгүүрээ нээсэн байдаг бөгөөд фитнес, кино театр, кафе зэрэг үйлчилгээний олон төв байдаг байна.
№4. BERJAYA TIMES SQUARE / 700.000 М.КВ
- Хаана байдаг: Куала Лумпур / Малайз
- Хэзээ нээгдсэн: 2003
- Дэлгүүрийн тоо: 1000+
“The Berjaya Times Square” нь 203 м өндөр орон сууц, худалдааны төвийн зориулалт бүхий томоохон цогцолбор юм. 48 давхар барилгад офис, зоогийн газар, 1000 гаруй дэлгүүр, “2D / 3D” кино театр зэрэг бизнесийн чиглэлийн төв үйл ажиллагаагаа явуулдаг. Цогцолборын гол онцлог нь үйлчлүүлэгчдийнхээ алжаалыг тайлж амарч тухлахад зориулж бүтээн байгуулсан бяцхан цэнгэлдэх хүрээлэн, тоглоомын талбайг өвөрмөц байдлаар шийдэж өгсөн явдал юм.
№3. MALL OF ARABIA / 882.000 М.КВ
- Хаана байдаг: Каир / Египет
- Хэзээ нээгдсэн: 2010
- Дэлгүүрийн тоо: 900+
“The Mall of Arabia” нь Египетийг зорьж очсон жуулчин бүрийн нэн тэргүүнд очиж үзвэл зохих хамгийн том, хамгийн алдартай их дэлгүүр юм. 9000 гаруй машины зогсоолтой их дэлгүүрт 13 кино театр, усан оргилуур, зоогийн газар, 900 гаруй брэнд дэлгүүр болон дэлгүүр хэсэнгээ алжаалаа тайлах тухтай орчныг бүрдүүлсэн байх ажээ.
№2. THE NEW SOUTH CHINA MALL / 891.869 М.КВ
- Хаана байдаг: Дунгуань / БНХАУ
- Хэзээ нээгдсэн: 2005
- Дэлгүүрийн тоо: 2350
Архитектурын шийдлийг нь анх 20 давхар хэмээн баталсан ч 47 давхарт сүндэрлэсэн “The New South China Mall” нь 2005 онд нээгдсэн билээ. Их дэлгүүрийг бэлэн гоймон зарж тэрбумтан болсон БНХАУ-ын бизнесмен Алекс Ху бариулсан бөгөөд газраа буруу сонгосны улмаас их дэлгүүрээ эзэнгүйдүүлсэн гэдэг. 2350 гаруй түрээсийн лангуутай ч 2303 гаруй нь хоосон байдаг юм. Гэвч энэ бол нийт талбайнхаа хэмжээгээр хоёрдугаарт, түрээсийн талбайнхаа хэмжээгээр нэгдүгээрт бичигддэг дэлхийн хамгийн том их дэлгүүр билээ.
№1. THE DUBAI MALL / 1.124.000 М.КВ
- Хаана байдаг: Дубай / Арабын Нэгдсэн Эмират Улс
- Хэзээ нээгдсэн: 2008
- Дэлгүүрийн тоо: 1200+
“The Dubai Mall” нь барилгынхаа нийт талбайнхаа хэмжээгээр дэлхийн хамгий томд тооцогддог их дэлгүүр бөгөөд гаднах талбайдаа л гэхэд 14.000 машины зогсоолтой юм. Хамгийн тансаг зэрэглэлийн их дэлгүүрээр ч гэсэн нэрлэгддэг энэ их дэлгүүрт 1200 гаруй дэлгүүр, аквариум, мөсөн гулгуурын талбай, дэлхийн хамгийн том чихрийн дэлгүүр, боловсролын төв болон кино театр зэрэг олон сонирхолтой газар бий. Мөн түүнчлэн 25 өнгөөр солонгорч харагддаг усан оргилуурыг дурьдахгүй өнгөрөх аргагүй юм.
Мэдээнд өгөх таны үнэлгээ?
12167
0 эможи