Эбола өвчин улам бүр газар авч байгаатай холбогдуулан уржигдар АНУ-ын Иллинойс, Нью-Йорк, Нью-Жерси мужууд гурван долоо хоногийн хугацаатай хөл хорио тогтоожээ. Африкийн орнуудаас ирсэн онгоцууд эдгээр мужуудад байрлах олон улсын нийсэх онгоцны буудалд газарддаг бөгөөд өнгөрсөн баасан гарагт гэхэд л Африкт ажиллаж байгаад ирсэн Америкийн сувилагчийг албадан тусгаарласан байна. Хэдийгээр эмнэлгийн ажилтан өвчний халдвар аваагүй хэдий ч урьдчилан сэргийлэх үүднээс дээрх арга хэмжээг авчээ. Түүнээс гадна тус улсад өвчтэй эсэхийг тогтооход хоёр төрлийн тестийг хэрэглэхийг албан ёсоор зөвшөөрчээ.