Өвөр Монголын Өөртөө Засах Оронд шинээр байгуулагдаж буй “Чингис Хаан Эйрлайнз” компани (Genghis Khan Airlines) анхны нислэгээ 2019 оны эхээр хийхээр төлөвлөж байна.

Тус компани Хятадад үйлдвэрлэсэн ARJ21 тийрэлтэт онгоцыг дотоод нислэгт гарахдаа ашиглах юм. Ирэх таван жилд 25 онгоцыг 60 чиглэлд нисгэх төлөвлөгөөтэй байгаа талаар компанийн дарга Хао Ютао мэдээлжээ.

Харин ирэх найман жилийн дотор 150 чиглэлд 50 онгоц нисгэх замаар өргөжүүлэх цаашлаад олон улсын нислэгийг нэвтрүүлэх зорилготой гэнэ. Тус компани нисгэгч, техник засварын мэргэжилтэн, нислэгийн үйлчилгээний ажилтнууд зэрэг боловсон хүчнээ бэлдэж дууссан байна.   

Хятадын иргэний нисэхийн захиргааны газар гуравдугаар сард Өвөр Монголд “Чингис Хаан Эйрлайнз” компанийг байгуулах зөвшөөрөл олгожээ. Одоогоор тус бүс нутаг 28 иргэний агаарын тээврийн компанитай гэнэ.

ARJ21 тийрэлтэт онгоцыг Хятадын төрийн өмчит нисэх хүчний корпораци дотооддоо үйлдвэрлэсэн. Ийнхүү 78-90 хүний суудалтай 3,700 км зайнд нисэх хүчин чадалтай энэхүү тийрэлтэт онгоц анх удаа бүс нутагт нислэгт гарахаар болжээ.

Эх сурвалж: shine.cn