ОХУ-ын Ерөнхийлөгч Владимир Путин Ерөнхий сайд Дмитрий Медведев нар амралтын өдрүүдээ хамтдаа өнгөрүүлжээ. Тэд Новгород мужид өнгөрөөсөн талаар Путины хэвлэлийн төлөөлөгч Дмитрий Песков мэдээллээ. В.Путин, Д.Медведев нар энэ сарын 10-нд Новгород мужийн Липно аралд хүрэлцэн ирсэн байна. Үүний дараа Ильмень нуураар моторт завиар аялж, орон нутгийн загасчидтай уулзжээ. Загасчид төр, Засгийн тэргүүнээ шинэхэн загасны шөлөөр дайлж, яриа хөөрөө өрнүүлсэн талаар РИА Новости дамжууллаа. Сануулахад ОХУ-ын Ерөнхийлөгч болон Засгийн газрын тэргүүн жилд нэг удаа амралтын өдрөө хамтдаа өнгөрүүлж, албан бус уулзалт хийх уламжлал тогтоод байгаа билээ. Өнгөрсөн жил тэд Сибирийн бүсэд загасчилж, цаатнуудын отгоор зочилсон юм.