“Google” компани программ хангамжийг нь хэрэглэдэг үйлчлүүлэгч компаниудынхаа тоог нэмэгдүүлэхийн тулд онлайн уулзалт хийх зориулалттай шинэ компьютерээ танилцуулж байна.

"Онлайн уулзалтад зориулсан 999 ам.долларын үнэтэй “Chromebox”-т компьютер, камер болон удирдлага багтаж байгаа" гэж “Chromebook”-ийг хариуцсан Бүтээгдэхүүний менежментийн дэд захирал Кейсер Сенгупта мэдэгдлээ. “Chromebox”-ийн эхний хувилбарын техник хангамжийг “Asustek Computer” компани хийж гүйцэтгэсэн байна. “Dell” болон “Hewlett-Packard” компаниуд дараа дараагийн “Chromebox”-ийн техник хангамжийн түншээр ажиллах болжээ. 2013 оны зургадугаар сарын 30-наас есдүгээр сарын 7-ны хооронд АНУ-д хүүхдүүдийнхээ сургуулийн бэлтгэлийг хангаж байгаа эцэг, эхчүүдийн худалдан авсан нийт компьютерийн 3.3 хувийг “Chromebook” компьютерүүд бүрдүүлсэн байна. “Amazon.com” сайтаар зарагдсан нийт “Chromebook”-үүдийн дунд “Acer” болон “Samsung Electronics” компанийн үйлдвэрлэсэн компьютерүүд хамгийн өндөр гүйлгээтэй байжээ.