“BRICS”-ийн орнуудтай харьцуулахад ОХУ-ын компаниудын орлого ирэх нэг жилийн хугацаанд хамгийн их хувиар буурах төлөвтэй байна. “Bloomberg”-ийн шинжээчдийн тооцооллоор "Micex" индекст бүртгэлтэй 50 компанийн рублиэр нэрлэсэн орлого ирэх арванхоёрдугаар сард 17 хувиар буурах бол ам.доллараар үнэлсэн орлого 25 хувиар буурах төлөвтэй байгаа аж.

Харин АНУ-ын Хөрөнгийн биржид бүртгэлтэй ОХУ-ын компаниудын орлого 2.5 хувиар өснө гэж үзжээ. “BRICS”-ийн бусад гишүүдийн хувьд Бразил, Энэтхэгийн компаниудын борлуулалт мөн адил буурах бол БНХАУ-ын компаниуд бага зэрэгт өсөлттэй ажиллах төлөвтэй байна.

Газрын тос таван жилийн дундаж ханшийнхаа хагасаар үнэлэгдэж, Украйны асуудлаас үүдэн ОХУ олон улсын хоригтой нүүр тулснаар рублийн ханш огцом унаж, таваарын зах зээлээс хамааралтай тус улсын эдийн засаг агшсан юм. Шинжээчдийн таамгаар ОХУ-ын дотоодын нийт бүтээгдэхүүн 2016 оны II улирал хүртэл өсөх магадлал бага байгаа аж.

Эрчим хүчний бүтээгдэхүүний экспортоор дэлхийд тэргүүлэгч ОХУ-ын эдийн засаг 2000-2009 онд дунджаар 5.6 хувиар өссөн боловч энэ онд 3.6 хувиар агшиж, 2016 онд 0.5 хувиар л өсөх төлөвтэй байна.