Холивудын алдарт жүжигчин Анжелина Жоли шинэ кинонд тоглох бүртээ тухайн дүрд өөрийгөө бүрэн зориулж, огт өөр хүн болж хувирдаг чадварлаг жүжигчин. Саяхан "Maleficent" киноны хоёрдугаар ангийн зураг авалт өндөрлөсөн бол, долоо хоногийн өмнө жүжигчин бүсгүй "Come Away" нэртэй цоо шинэ төслийн зураг авалтад оролцож эхэлжээ.

Өөрийн цахим хуудсандаа тус киноны зураг авалтын талбай дээрх гэрэл зургууд цацсан бөгөөд эдгээр зургуудад Анжелина Жоли XIX зууны үеийн хувцас өмсөж, шаргал өнгийн хиймэл үс зүүж, дүр төрхөө эрс шинэчилсэн нь харагдлаа.

Оскарын шагналт найруулагч Бренда Чепмений бүтээж байгаа "Come Away" нэртэй уран зөгнөлт, утга уянгын кинонд "Алиса гайхамшгийн оронд" ба "Питер Пен" үлгэрүүдээс өмнө болсон үйл явдал гарах юм.