Жүжигчин ба дуучин Зои Кравиц америкийн Harper's Bazaar сэтгүүлийн аравдугаар сарын дугаарын гол дүрээр тодорчээ. Зурагчин Камилла Акрансын хариуцсан зураг авалтад Зои хоёр чонын хамтаар элсэн цөл дунд зургаа даруулсан бөгөөд сэтгүүлд нийтлэгдсэн зургуудыг нэг ч янзлаагүй гэдгээрээ онцлог болсон байна. Шинэ дугаарт зориулан Зои мөн богино хэмжээний ярилцлага өгч, бага насны дурсамж, олон нийтийн сүлжээ болоод фотошопын талаар сэтгэгдлээ хуваалцжээ.

Тэрбээр "Би бага насаа чононуудын хамт өнгөрүүлсэн. Миний ээж чононд их хайртай байсан. Намайг бага байхад манайд хагас чоно хагас хаски болон маламут байлаа. Хүүхэд насаа эдгээр том амьтдаар хүрээлүүлэн өнгөрүүлсэн бөгөөд тэд миний найзууд байсан" хэмээн ярьжээ.