Facebook компани цахим валют, Биткойнтой холбоотой бүх төрлийн сурталчилгааг хориглож буйгаа зарлалаа. Шинээр батлагдсан журамд дурдсанаар “Цахим валют, ICO зэрэг бусдыг төөрөгдүүлсэн санхүүгийн бүтээгдэхүүн үйлчилгээтэй холбоотой сурталчилгааг хориглоно” гэж заажээ.

Сүүлийн үед биткойн тэргүүтэй цахим валютын эрэлт эрчимтэй нэмэгдэж, түүнийг нь дагасан луйвар, залилан болон бусад төрлийн эрсдэл нэмэгдэх болсон юм. Тиймээс Facebook бүх төрлийн цахим валюттай холбоотой сурталчилгааг хориглохоор болжээ.

Компанийн төлөөлөгчийн тайлбарласнаар Биткойны хэтэвч, Эфериум олборлогчын тухай сурталчилгааг хүртэл хориглох юм байна. Гэхдээ ирээдүйд энэ төрлийн валюттай холбоотой хууль, эрхзүйн зохицуулалт жигдэрсэн тохиолдолд шинэчилсэн зар сурталчилгааны бодлого баримтлах аж.

Харин одоогийн байдлаар цахим валюттай холбоотой хуурамч, залилангийн мэдээлэл ихээр гарч байгаа учраас үүнээс сэргийлэхийн тулд ийм арга хэмжээ авчээ.

Эх сурвалж: Facebook