Өнөөдөр буюу арваннэгдүгээр сарын 17-ны өдөр АНУ-ын нийслэлд Библийн музей нээгдэж буй талаар ТАСС агентлаг мэдээлсэн байна. Тус музейн ёслолын ажиллагаанд Вашингтоны хамба лам, гэгээнтэн Дональд Уэрл, АНУ дахь Израилийн Элчин сайд Рон Дермер, Америкийн сайдууд болон бусад хүндэт зочид оролцох ажээ.

Нийт 500 сая ам.долларын өртгөөр боссон энэхүү музейн тууз хайчлах ёслолын ажиллагаанд АНУ-ын дэд ерөнхийлөгч Майкл Пэнс уригдсан байна. Тус музей нь 40 мянган хавтгай дөрвөлжин метр талбайтай бөгөөд барилгын ажил нь 2014 оны намар эхэлжээ. Энэхүү Библийн музей бараг хотын төвд, АНУ-ын Конгрессээс холгүйхэн оршдог тул илүү олон зочныг музей рүү татах болно гэж найдаж буй аж.