Хоёрдугаар сарын 9-25-ны өдрүүдэд зохиогдох “Пёнчан-2018” өвлийн олимпийн наадмын бамбарыг асаах ёслол Грекийн өмнөд нутагт орших эртний Олимпия хотын туурин дээр болжээ.

Мягмар гарагт болсон уг арга хэмжээнд Олон улсын олимпийн хорооны ерөнхийлөгч Томас Бах, “Пёнчан-2018” өвлийн олимпийг зохион байгуулах хорооны дарга И Хэ Бём тэргүүтэй албаны хүмүүс оролцсон байна.

Грекийн цаначин Апостолос Аггелис бамбарын гурван сарын буухиаг эхлүүлсэн байна.

Бамбарыг энэ сарын эцэс хүртэл Грек даяар аялуулсныхаа дараа “Пёнчан-2018” эхлэхээс 100 хоногийн өмнө буюу ирэх сарын 1-нд Өмнөд Солонгост авчрах аж. Бамбарыг нийтдээ 7500 тамирчин 2018 км газраар аялуулахаар төлөвлөжээ. “Пёнчан-2018” өвлийн олимпийн наадмын цэнгэлдэх хүрээлэнд авчрахаасаа өмнө бамбарыг Өмнөд Солонгосын найман мужийн найман томоохон хотоор аялуулах аж.