Нийслэлийн 375 жилийн ойг угтан орчин үеийн үсний тайралт, самналт, нүүр будалт, хумс засалтын орчин үеийн шинэ дэвшилтэт технологийн харуулах, харилцан суралцах, өрсөлдөх чадварыг дээшлүүлэх зорилгоор Хан-Уул дүүргийн 2014 оны аварга шалгаруулах үсчин, гоо засалч, хумс дизайн урлалын тэмцээнийг 2014 оны 10 дугаар сарын 10-ны өдөр амжилттай зохион байгууллаа.

Тэмцээнд ХУД-ын нутаг дэвсгэрт үйлчилгээ эрхэлдэг 12 салоны 30 гаруй үсчин, гоо сайханчид эмэгтэй урт үсний үдшийн гоёлын самналт, эрэгтэй сонгомол засалт, эрэгтэй, эмэгтэй загварын тайралт, тайзны нүүр будалт, хумс засалт гэсэн 6 төрөлд ур чадвараараа өрсөлдөж алт, мөнгө, хүрэл медалийн эздээр шалгарч, дүүргийн “Шилдэг үсчин”-ээр “Eku hair studio” салоны үсчин н.Одзаяа шалгарлаа.

Тэмцээний шүүгчээр Монголын үсчин, гоо засалчдын мэргэжлийн холбооны тэргүүн  Ц.Цогзолмаа, “Evergood” салоны захирал, мастер гоо засалч О.Оюундарь, Азийн 2 удаагийн аварга, Европын 1 удаагийн аварга Н.Алтаншагай, Азийн хүрэл медальт Монгол улсын мастер үсчин н.Балжинням нар ажиллалаа.

Матрикс, Хулан, Энх-Оюу, Golden beauty, Болор салон зэрэг салонууд 2014 оны Улсын аварга шалгаруулах тэмцээнд ХУД-ын нэрийн өмнөөс оролцох эрхтэй болсон байна.