АСУУЛТ: Газар тариалангийн үйлдвэрлэл эрхэлж байгаа иргэн, аж ахуйн нэгж Нэмэгдсэн өртгийн албан татвараас чөлөөлөгдөх үү?

ХАРИУЛТ: Нэмэгдсэн өртгийн албан татварын тухай хуулийн 13 дугаар зүйлийн 13.1.18-д зааснаар газар тариалан эрхлэгчийн дотооддоо тарьж борлуулсан үр тариа, төмс, хүнсний ногоо, жимс жимсгэнэ, үйлдвэрлэсэн гурилыг нэмэгдсэн өртгийн албан татвараас чөлөөлнө.

АСУУЛТ: Хувьцаа борлуулахад Нэмэгдсэн өртгийн албан татвар ногдуулах уу?

ХАРИУЛТ: Нэмэгдсэн өртгийн албан татварын тухай хуулийн 13 дугаар зүйлийн 13.6.4-д “үнэт цаас, хувьцаа гаргах, шилжүүлэх, хүлээн авах, тэдгээрт баталгаа гаргах үйлчилгээ”-г нэмэгдсэн өртгийн албан татвараас чөлөөлөхөөр заасан байдаг.

АСУУЛТ: Өр төлбөрийг бараа шилжүүлэх замаар хаавал нэмэгдсэн өртгийн албан татварыг яаж төлөх вэ?

ХАРИУЛТ: Нэмэгдсэн өртгийн албан татварын тухай хуулийн 16 дугаар зүйлийн 16.1.3-т ” энэ хуулийн 7.3.4 /өрийн төлбөрийг бараа шилжүүлэх замаар хаах/, 7.4.8 /өрийн төлбөрийг ажил, үйлчилгээ үзүүлэх замаар хаах/-д заасан өрийн төлбөрт тооцогдох бараа, ажил, үйлчилгээнд ногдох нэмэгдсэн өртгийн албан татварыг тухайн төлбөр төлж байгаа этгээд төсөвт төлөх” гэж заасны дагуу төлнө.

АСУУЛТ: Импортоор оруулж ирж байгаа бараанд хэн нэмэгдсэн өртгийн албан татварыг ногдуулж төлөх вэ?

ХАРИУЛТ:Нэмэгдсэн өртгийн албан татварын тухай хуулийн 16 дугаар зүйлийн 16.2.1-д заасны дагуу гаалийн байгууллага ногдуулан авч төсөвт төлнө.