Амралт, аялал зугаалгын цаг эхэлсэнтэй холбоотойгоор тус газрын  Иргэний гадаадад зорчих эрхийн бүртгэлийн хэлтсийн ачаалал нэмэгдээд сар гаруй хугацаа өнгөрч байна.  Дотоод зохион байгуулалтаа сайжруулж уртасгасан цагаар ажиллаж байгаа ч энэ ачаалал буурахгүй өдөр бүр нэмэгдсээр байгаа юм.
Тус хэлтэс өдөрт дунджаар 450 гаруй гадаад паспорт шинээр хэвлэдэг байсан бол одоо өдөрт 750 цаашлаад 1 мянган хүнд үйлчилж байна.

Иргэдэд түргэн шуурхай хүнд сурталгүй үйлчлэхээр аль болох шат дамжлагаа цөөрүүлэх байдлаар ачааллыг зохицуулж байгаа ч нэг бүртгэгч өдөртөө 200 хүнтэй харьцах шаардлага гарч байгаа юм. Гадаадад зорчих эрхийн бүртгэлийн хэлтэс нь 10 цонхоор иргэдийн материалыг хүлээн авч байна.

Оочер дарааллыг ихээр үүсгэдэг бас нэг шалтгаан нь гадаад паспорт хүсэгч нь материалаа дутуу бүрдүүлдэгтэй холбоотой. Иргэний үнэмлэх, паспортын хэмжээгээр 3 хувь цээж зураг, төлбөр төлсөн баримт, бөглөсөн анкет зэргийг үндэслэн гадаад паспортын захиалга хүлээн авдаг. Гэтэл иргэд энгийн хэмжээтэй чанарын шаардлага хангахгүй цээж зураг авч ирэх нь элбэг тохиолддогийн зэрэгцээ цагийг нь тулгаж үйлчлүүлэх явдал нилээдгүй байна.
Тиймээс аль болох гадаад паспорт захиалах материалаа бүрэн гүйцэд бүрдүүлэхээс гадна чанарын шаардлага хангасан цээж зурагтай, өөрийн биеэр ирж үйлчлүүлэх нь зүйтэй. Гадаад паспортын ачаалал 9 сар хүртэл үргэлжлэх хандлагатай байгаа учраас хуагцааг нь тулгахгүй эртнээс захиалахыг зөвлөж байна.
Гадаад паспорт шинээр авах хүсэлтэй иргэд нь заавал өөрийн биеэр байх ёстой. Гадаад паспорт шинээр авахад 1 болон 5 жилээр байх бөгөөд энгийн үйлчилгээ ажлын 7-10 хоногт, яаралтай үйлчилгээ ажлын 3 хоногт гарна. Харин гадаад паспортын хугацааны сунгалт 1-5 жилээр  хийгддэг бөгөөд ажлын 8  цагт багтаж гарна.