"Гурван гал" эмнэлгийн урд байрлах "Монос" эмийн сангаас эмчийн тусгай жорын дагуу "Фенобарбитал" эмийг худалдан авч уулгаж тус эмэнд хордсон 16 хүүхдийн эмэнд холбогдох байгууллагууд хяналт шалгалт хийж байна. Үүнтэй холбогдуулан Нийслэлийн Мэргэжлийн хяналтын газар ЭМБСХХ-ийн дарга Г.Батмөнхөөс тодрууллаа.
Сайн байна уу? 16 хүүхдийг хордлогонд оруулсан фенобарбитал эмийг цаашид яахаар болсон вэ?  
Эмний хордлоготой холбоотойгоор НМХГ-аас шуурхай шалгалт хийсэн. Одоогийн байдлаар 31 аж ахуй нэгжид дөрвөн групп гаргаад шалгалт хийж байна. Энэ хүрээнд сэтгэцэд нөлөөлөх эм борлуулдаг 15 байгууллагыг хамруулсан бөгөөд дээрх 31 байгууллагад 45 зөрчил илрээд байна. Одоогийн байдлаар 11 байгууллагад улсын байцаагчын актаар үүрэг даалгавар өгч 1 байгууллага 3 ажилтанд 2.7 сая төгрөгийн торгуулын арга хэмжээ авч ажиллалаа. Мөн эмийн санд тавигдах Монгол улсын стандартыг хангаж ажлаагүй “Эв эрдэнэ”, “Бишрэлт асга”, “Номун Тамир”, “Золбуян”, “Монос Таваншар”, “Монгол фарм”, “Бадаан”, “Фүжи Фарм” зэрэг байгууллагуудад  дотоод хяналт хангалтгүй байгаа зэрэг зөрчлүүдийг хангуулахаар үүрэг өгөгдөөд явж байна.
Тус эмийг татан авснаар эмийн хомсдол бий болох уу, цаашид тус эм шаардлагатай хүүхдүүдэд  ямар арга хэмжээ авах вэ?
Манай улсад импортоор тус эм орж ирж байгаа. Энэ эмнүүд дэлхий дахинд хэрэглэгдээд олон жил болж байна. Манай улсад  Герман, Филлипин, Индонезаас орж ирдэг. Импортоор орж ирж байгаа эмэнд татан авалт хийгдээгүй. Харин татан авалт хийгдсэн эмийн хувьд хаяг адресс, тун, сав баглаа боодол нь тодорхойгүй Монголд үйлдвэрлэсэн эмнүүд байгаа юм.  Импортоор орж ирдэг болохоор тус эмийг хэрэглэдэг хүүхдүүдэд асуудал гарахгүй. Харин тус үйлдлээс болж эмийн санч нарт том сургамж болсон гэж бодож байна.  
Фенобарбиталийг Монгол улсын эмийн бүртгэлд бүртгэгдээгүй байна гэж татан авалт хийлээ. Харин дээр хийсэн хэвлэлийн бага хурал дээр Нийслэлийн эрүүл мэндийн газраас тус эмийг бүртгэлтэй эм гэж байсан. 1976 оноос хойш үйлдвэрлэгдсэн эмийг энэ хугацаанд бүртгэгдээгүй явсан гэсэн үг үү?
Тус эмийг 1976 оноос хойш үйлдвэрлэж эхэлсэн юм. Харин манайд эмийн бүртгэлийг гурван жилийн өмнөөс ЭМЯ-ны комиссоос хийж Мэргэжлийн хяналтын газар зөвшөөрөл өгч хийдэг. Харин энэ хугацаанд бүртгүүлж гэрчилгээ авах ёстой байсан.  Өмнө нь бид эм үйлдвэрлэгч байгууллагуудад хэд хэдэн удаа албан даалгаврыг өгч 2013 онд 40 гаруй байгууллагыг хаах хүртэл арга хэмжээг авч байсан юм. Ер нь татан авалтыг хийх нь зөв шийдвэр гэж бодож байна.

Эцэг эхчүүд өөр өөр газар үзүүлсэн ч эмч нар тус эмийг “Гурван гал” эмнэлгийн Монос эмийн сангаас аваарай гэж хэлсэн байсан. Тэгэхээр тухайн газраас өөр эмийн санд зарагддаггүй юм уу?
 15 салбар эмийн сангуудаар тус эмийг борлуулдаг байсан. Одоогоор дээрх 15 эмийн санд байсан эмнүүд болон “Эмийн үйлдвэр” ХХК-ний нийт 70  гаруй мянган эмийг лацдаад татаж аваад байна.  Үүнээс гадна эмийн сангуудад гарч байгаа нэг асуудал нь эмийн жор бичилтийн асуудал орж байна. Өнгөрсөн жил Мэргэжлийн хяналтын газраас шалгалт хийхэд эмийг жорын дагуу олгохгүй, эмч өөрийн нэрийг буруу бичих, тамга тэмдэг дутуу гэх мэт алдаанууд гарч байна. Үүнээс гадна эмийн санч нар давхар хяналт хийж эмийн жорын дагуу үйлчлэх хэрэгтэйг анхааруулж байгаа юм.

Ярилцлага өгсөн танд баярлалаа.