“Монголын төмөр зам” ТӨХК-ийн хэрэгжүүлсэн Багахангай–Хөшигийн хөндий–Эмээлт чиглэлийн 127.1 км төмөр замын нээлтийн бэлтгэл ажлын хүрээнд өнөөдөр (2026.10.10) тусгай үүргийн галт тэрэг аялуулж, тээвэрлэлтийн бэлэн байдлыг шалгалаа. Уг аялалд Зам, тээврийн сайд Б.Дэлгэрсайхан, “Монголын төмөр зам” ТӨХК-ийн Гүйцэтгэх захирал О.Батчулуун болон төмөр замын салбарын байгууллагуудын удирдлагууд оролцож, шинэ төмөр замын ашиглалтын бэлэн байдал, нээлтийн бэлтгэл ажилтай газар дээр нь танилцав.

Үндэсний аж ахуйн нэгжүүд, монгол инженер, техникийн ажилтнууд, төмөр замчдын хүч хөдөлмөрөөр бүтээн байгуулсан энэхүү төмөр зам нь Багахангай өртөөнөөс эхэлж, Хөшигийн хөндийгөөр дамжин Эмээлт өртөөнд холбогдож байна. Төслийн хүрээнд Туул гол дээгүүрх 476 метр урт төмөр замын гүүр, 33 метр гүн ухмал зэрэг инженерийн томоохон байгууламжуудыг барьж байгуулсан нь үндэсний төмөр замын бүтээн байгуулалтын нэгэн чухал ололт юм.

Шинэ төмөр зам ашиглалтад орсноор нийслэлийн төвөөр дамжин өнгөрөх аюултай ачаа тээврийг хотын төвөөс тойруулан зохион байгуулах, авто замын ачааллыг бууруулах, тээвэр, логистикийн хүчин чадлыг нэмэгдүүлэх боломж бүрдэнэ.