“ТОП-100 Аж Ахуйн Нэгж”-ийн нэг ноос, ноолуурын салбарын үйлдвэрлэгч Ханбогд кашмер ХХК-ийн эзэн Ч.Ганцэцэг Хөгжлийн банкнаас авсан зээлээ зориулалтын бусаар зарцуулсан нь Хөгжлийн банкны нээлттэй сонсголоор ил болж байв. 

Хөдөлмөрийн баатар Ч.Ганцэцэг нь "Ханбогд кашмер" ХХК, “Ханбогд” ББСБ,“Ханбогд” корпорацийг тус тус 100 хувь эзэмшдэг бол “Дархан Алтантуул” ХХК-ийн 70 хувь, “Фэрст класс трейд” ХХК-ийн 40 хувийг эзэмшдэг.

Тэрээр өөрийн эзэмшдэг компаниудаар дамжуулан Хөгжлийн банкнаас нийт 82 тэрбумыг авч байсан. Түүнчлэн “Ноолуур хөтөлбөр-2019” хүрээнд 25 тэрбумын зээл санхүүжилт авч 8 тэрбумыг хадгаламжиндаа хийж, 13 тэрбумаар өмнөх зээлээ хаасан нь нотлогдож байв. 

Тэгтэл амташсан хэрээ 13 дахина гэгчээр Хөдөлмөрийн баатар Ч.Ганцэцэг хөдөө аж ахуйн салбараас 182 тэрбум төгрөгийн хөнгөлөлттэй зээл авсан нь “Хөдөө аж ахуйн хөнгөн үйлдвэрийн салбарт 2008 оноос хойш төрөөс олгож буй дэмжлэг урамшуулал, Засгийн газраас хариуцан төлж буй зээлийн хүүгийн татаас олголтын байдал, хэрэгжилт”-ийн ерөнхий хяналтын сонсголын үеэр ил боллоо.