Азийн аялал жуулчлалын 15 дахь форум (Asia Tourism Forum)-ыг Монгол Улсад 2026 оны 06 дугаар сарын 11–13-ны өдрүүдэд зохион байгуулахтай холбогдуулан Монгол Улсад хүрэлцэн ирсэн Хонконгийн Политехник Их Сургуулийн Зочлох үйлчилгээ, аялал жуулчлалын сургуулийн захирал профессор Kай Чон (Kaye Chon) болон тус сургуулийн профессор Тони Цэ (Tony Tse) нарыг тус яамны Аялал жуулчлалын бодлого, зохицуулалтын газрын дарга В.Батчимэг хүлээн авч уулзлаа.

Уулзалтын үеэр талууд аялал жуулчлалын салбарын тогтвортой хөгжлийн үндэс нь мэргэжлийн хүний нөөц, үйлчилгээний чанар болохыг онцолж, дэлхийн хэмжээнд аялал жуулчлал, зочлох үйлчилгээний боловсролоор тэргүүлэгч Хонконгийн Политехник Их Сургуулийн Зочлох үйлчилгээ, аялал жуулчлалын сургуультай хамтран салбарын хүний нөөцийг чадавхжуулах, богино хугацааны сургалт зохион байгуулах, Монгол Улсаас оюутнуудыг бакалавр, магистр, докторын түвшинд суралцуулах боломжийг өргөжүүлэх чиглэлээр хамтран ажиллахаар боллоо.

Тус форумыг Монгол Улсад зохион байгуулах нь олон улсын эрдэмтэн, судлаачид, салбарын мэргэжилтнүүдийн туршлага, мэдлэгийг нутагшуулах, аялал жуулчлалын салбарын хүний нөөцийн хөгжилд чухал хувь нэмэр оруулах ач холбогдолтойг талууд онцоллоо.