Цахим орчинд олонд танигдсан аж ахуйн нэгжийн нэрийг ашиглан хуурамч хаяг нээн мэдээлэл оруулж бусдыг залилах тохиолдол гарч байгааг Улсын Ерөнхий Прокурорын Газар (УЕПГ)-аас анхааруулж байна. 

Энэ талаар Чингэлтэй дүүргийн прокурорын газрын хэрэг бүртгэх, мөрдөн байцаах ажиллагаанд хяналт тавих ажил хариуцсан хяналтын прокурор Б.Бат-Эрдэнэ дараах сэрэмжлүүлэг мэдээллийг хүргэлээ. 

Тэрбээр хэлэхдээ "Чингэлтэй дүүргийн нутаг дэвсгэрт бүртгэгдэж буй хэрэг зөрчлийн дийлэнх хувийг залилангийн гомдол мэдээлэл эзэлж байна. Үүнийг 2026 оны дөрөвдүгээр сарын байдлаар авч үзвэл 587 гэмт хэргийн шинжтэй гомдол мэдээлэл бүртгэгдсэн.

Мөн хусдаг сугалаа, бооцоот тааврын залилан гарч байна. Сүүлийн үед бүртгэгдэж буй гэмт хэргийн хувьд "KFC"-ийн лого болон арилжааны банкны лого мэдээллийг ашиглаж, тус холбоос дээр дарж өөрсдийн хувийн мэдээллийг оруулж алдсанаар тухайн иргэдийн арилжааны банкнаас мөнгийг нь залилж авч буй тохиолдол мөрдөн шалгах ажиллагаагаар тогтоогдож байна.

Иймд олон нийтийн цахим сүлжээнд байршуулсан мэдээ мэдээллийг нягтлах, хувийн болон арилжааны банкны мэдээллийг бусдад шилжүүлэхгүй байснаар залилах гэмт хэргийн хохирогч болохоос урьдчилан сэргийлнэ" хэмээн анхаарууллаа.