Нэр бүхий олон дагагчтай цахим хуудсаар дамжуулан Х нарын бүлэг этгээдүүд нь Ланд 300 маркийн тээврийн хэрэгслийн хонжворт сугалааг хуурамч байдлаар зохион байгуулж өөрийн хамаарал бүхий хүнийг азтанаар шалгаруулж, сугалаанд оролцсон 7210 иргэнийг залилсан байж болзошгүй нөхцөл байдал тогтоогдон шалгалтын ажиллагааг үргэлжлүүлж байна. 

Мөрдөн шалгах албаны залилах гэмт хэрэгтэй тэмцэх газар нь Сангийн яам, Монополын эсрэг газар, Татварын ерөнхий газартай хамтран цахим орчинд эд мөнгөний хонжворт сугалаа гаргах ажлыг зохион байгуулдаг 30 гаруй аж ахуй нэгжийн үйл ажиллагаанд хяналт шалгалтын  ажлыг зохион байгуулсан ба гэмт хэргийн шинжтэй үйлдлийг илрүүлэн холбогдох мөрдөн шалгах ажиллагааг үргэлжлүүлж байна. 

Тусгай зөвшөөрөлгүй иргэн аж ахуй нэгж нь энэ төрлийн хонжворт сугалааг зохион байгуулж залилах гэмт хэрэг үйлдэх тохиолдол ихээр бүртгэгдэж байгаа тул иргэд та бүхнийг энэ төрлийн гэмт хэргийн хохирогч болохоос урьдчилан сэргийлэхийг цагдаагийн байгууллагаас зөвлөж байна.