АҮЭБ-ийн дэд сайд Б.Энхтүвшин цаг үеийн асуудлаар мэдээлэл өгч байна.

Б.Энхтүвшин "Өнөөдрийн байдлаар АИ-92 шатахуун 90.1 мянган тонн буюу 42 хоногийн нөөцтэй байна. АИ-95 шатахуун 6.4 мянган тонн буюу 72 хоногийн нөөцтэй байна. Дизель түлш 116 мянган тонн буюу 29 хоногийн нөөцтэй байна. Өчигдөр Үнэ, хангамжийн зөвлөлийг хуралдуулж, тодорхой зөвлөмжийг гаргасан. Үүнтэй холбогдуулан зарим мэдээллийг хүргэе. ОХУ-аас дөрөвдүгээр сард нийлүүлэх хил үнийг ирүүлсэн.

Монгол улсын хэмжээнд 1200 гаруй вагон шатахуун байна. Бүх ШТС-уудын нөөцийн сав дүүрэн. Эдгээр нь сарын л нөөц юм.

Энгийн АИ-92 шатахуунаас бусад төрлийн шатахууны үнийг 300–350 төгрөгөөр нэмэгдүүлэх зөвлөмж өгсөн. Шатахууны үнийг огцом өөрчлөлт хийхгүйгээр шат дараатай нэмнэ. Хил үнийг тооцоолбол 900–2000 төгрөгөөр нэмэгдэхээр тооцоо гарсан. Гуравдугаар сард дизелийн түлш 54 ам.доллароор, автобензин 30 ам.доллароор тус тус нэмэгдсэн.

Ард иргэддээ хэрэглээндээ хямгатай байхыг уриалж, зайнаас ажиллах нөхцөл боломжуудыг судалж байна. Дугаарын хязгаарлалтыг хэрэгжүүлж, боломжтой бол нэгнийхээ унаанд дайгдах байдлаар эргэлтээ багасгавал шатахууны нийлүүлэлт хангалттай." гэв.