Цагдаа, дотоодын цэргийн байгууллагаас өнгөрсөн оны ажлын үр дүн, гүйцэтгэлээ дүгнэж, тулгамдсан асуудлаа шийдвэрлэх арга замаа тодорхойлж, шинэлэг техник, технологид тулгуурлаж ажлын бүтээмжийг нэмэгдүүлэх удирдлагын түвшинд хэлэлцэх, гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах чиг үүргийн хүрээнд цаашид авч хэрэгжүүлэх арга хэмжээний зорилтыг тодорхойлох нэгдсэн зөвлөгөөн зохион байгуулж байна.

Зөвлөгөөний нээлтэд Монгол Улсын Ерөнхий сайд Г.Занданшатар, Хууль зүй, дотоод хэргийн сайд Б.Энхбаяр, Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд нар болон цагдаа, дотоодын цэргийн байгууллагын удирдах ажилтнууд оролцсон юм. 

Зөвлөгөөн энэ оны 01 дүгээр сарын 15,16-ны өдрүүдэд үргэлжлэх бөгөөд “Стратеги, бодлого”, “Гадаад, дотоод бодлого, нөхцөл байдал”, “Дижитал шилжилт” агуулгын хүрээнд мэргэшсэн сургагч багш нар сургалтыг удирдан явуулж байна.