Жирэмсэн эмэгтэй, дөрвөн настай охиныг хөнөөсөн М.Батчулууныг баривчилсан шийдвэрийг хүчинтэйд тооцож, нэг сар цагдан хорих шийдвэрийг шүүхээс гаргажээ.

Тодруулбал, Б.М (30 настай), С.А (4 настай) нар энэ оны нэгдүгээр сарын 4-ний өдрийн 07:50 цагаас 09:55 цагийн хооронд бусдад хутгалуулж нас барсан. Мөн С.А (2 настай) мэсэнд зүсэгдсэн шархтай, Цэргийн төв эмнэлэгт хүргэгджээ.

Цагдаагийн байгууллагаас дээрх гэмт хэргийг үйлдсэн байж болзошгүй сэжигтэн М.Б-г нэгдүгээр сарын 4-ний өдрийн шөнийн 23:10 цагаас эхлэн сэжигтнээр баривчилжээ.

Харин “хэргийн газарт болон тухайн хүний хувцас, бие, орон байр, эд зүйл, тээврийн хэрэгсэлд ул мөр илэрсэн” гэх үндэслэлээр сэжигтэн М.Б-г цагдан хорих саналыг нэгдүгээр сарын 5-ны өдөр прокурорын байгууллагаас шүүхэд хүргүүлсэн байна.

Шүүхээс яллагдагчийн холбогдсон гэмт хэргийн шинж, нийгмийн аюулын хэр хэмжээ зэргийг харгалзан яллагдагч М.Б-д цагдан хорих таслан сэргийлэх арга хэмжээ авчээ.