Улсын Хоёрдугаар төв эмнэлэг НЬ “Монгол Улсад эмчлэгдэх боломжгүй өвчлөлийг бууруулах” бодлогын хүрээнд дэвшилтэт технологи, арга, аргачлал нэвтрүүлэх, хүний нөөцийг бэлтгэх, сургах, гадны улс орнуудтай хамтын ажиллагаагаа өргөжүүлэх зэрэг олон ажлыг хийж хэрэгжүүлдэг. 

Тэгвэл энэ ажлын хүрээнд УХТЭ нь БНСУ-ын Samsung Medical center эмнэлэгтэй 2002 оноос хойш хамтран ажиллаж байгаа бөгөөд өчигдөр буюу 09 дүгээр сарын 24-ний өдөр хамтын ажиллагааг өргөжүүлэх санамж бичигт гарын үсэг зурлаа. 

Тус үйл ажиллагаанд УХТЭ-ийн Ерөнхий захирал Э.Анхбаяр, Samsung Medical center эмнэлгийн Эрхтэн шилжүүлэн суулгах тасгийн профессор Ким Жан Ман, профессор Кан Вонсог, УХТЭ-ийн дэд захирал Д.Цогт-Очир болон бусад албаныхан оролцлоо.

Энэ үеэр УХТЭ-ийн Ерөнхий захирал Э.Анхбаяр "УХТЭ нь гадаад харилцаа, хамтын ажиллагаагаа сайжруулах хүрээнд олон ажлыг хийж хэрэгжүүлдэг. Энэ ажлын нэг бол бид 2019 оноос хойш БНСУ-ын Samsung Medical center эмнэлэгтэй хамтран ажиллаж байна. 

Энэ онд бид тус эмнэлгийн эмч, мэргэжилтнүүдтэй хамтран элэг шилжүүлэн суулгах таван мэс заслын донорын хагалгааг дурангийн аргаар хийсэн. Цаашид бид хавдрын мэс засал, эмчилгээ, шигдээс, ангиографийн чиглэлээр шинэ технологи, инновацийг нэвтрүүлэн хамтран ажиллахаар боллоо. Энэ ташрамд бидний эмчилгээ үйлчилгээнд хамтран ажиллаж, үргэлж дэмжиж, сургаж ажиллаж буй Samsung Medical center эмнэлгийн хамт олондоо талархал илэрхийлье." хэмээлээ. 

Samsung Medical center эмнэлгийн Эрхтэн шилжүүлэн суулгах тасгийн профессор Ким Жан Ман: 

Samsung Medical center эмнэлэг нь 2003 онд анх УХТЭ-тэй хамтын ажиллагааг эхлүүлж, энэ хүрээндээ элэг шилжүүлэн суулгах багийн эмч, мэргэжилтнүүдийг бэлтгэж эхэлж байсан. Тэгвэл өнөөдөр тус эмнэлгийн Элэг шилжүүлэн суулгах багийн хамт олон таван мэс заслыг дурангийн аргаар амжилттай хийсэн. Цаашид бид тус эмнэлгийн элэг шилжүүлэн суулгах багийн хамт олныг бие даан элэг шилжүүлэн суулгах мэс засал хийлгэх, мөн бөөр шилжүүлэн суулгах мэс заслыг эхлүүлэхэд нь хамтран ажиллах хүсэлтэй байгаа. 

Тус эмнэлгийн эмч, мэргэжилтнүүд нь сурах чин хүсэл эрмэлзлэлтэй байгаа нь манай багийг дахин дахин Монгол Улсад ирэхэд хүргэдэг. Бидний зүгээс хамтран ажиллахдаа баяртай байх болно.