ОХУ-ын Буриадын Бүгд Найрамдах Улсад Монгол Улсын иргэнийг гаалийн хяналтгүй их хэмжээний бэлэн мөнгө хилээр нэвтрүүлсэн хэргээр өндөр торгууль ногдуулжээ.

Эхний шатны буюу Хиагтын дүүргийн шүүхээс түүнд 217 мянган рублийн торгууль оногдуулж, хууль бусаар нэвтрүүлсэн 280 мянган юанийн бэлэн мөнгийг буцаан олгосон байна. Гэвч прокурор энэхүү шийдвэрийг шударга бус, ялын хэмжээ нь зөрүүтэй хэмээн үзэж, мөн хууль бусаар нэвтрүүлсэн мөнгийг улсын орлого болгоогүйг шүүмжилж Улсын дээд шүүхэд давж заалджээ.

Улмаар Дээд шүүхээс ялыг чангатгаж, 2.7 сая рублийн торгууль оноон, 280 мянган юанийн бэлэн мөнгийг улсын орлого болгож хураахаар шийдвэрлэсэн байна.

Мөн торгуулийн ялыг бүрэн төлөх хүртэл шүүхээс тухайн иргэний хил нэвтрэхдээ хэрэглэсэн автомашин болон хууль ёсоор нэвтрүүлсэн бусад бэлэн мөнгөнд битүүмжилт тавьжээ. Шүүхийн эцсийн шийдвэр хүчин төгөлдөр болсон гэж Буриадын прокурорын газраас мэдээллээ.