УИХ-ын гишүүн асан Ц.Цэрэнпунцаг, “Эрэл”-ийн Б.Эрдэнэбат нарын хүүхдүүд бусдын биед онц ноцтойгоор халдсан хэрэг гарсан талаар цахим орчинд анх хохирогч гэх залуугийн эгч нь мэдээлсэн юм.

Улмаар уг хэргийн талаар цагдаагийн байгууллагаас өнөөдөр тодруулга мэдээлэл өглөө. Уг мэдээлэлд Ц.Цэрэнпунцагийн хүү С, “Эрэл”-ийн Б.Эрдэнэбатын хүү Т нар нь бусадтай бүлэглэн хохирогчийн биед халдаж, улмаар хоёр нь зугтжээ. Цагдаагийн байгууллагаас мөрдөн шалгах ажиллагааг явуулж байгаа бөгөөд зугтсан хоёр этгээдийг эрэн сурвалжилж байна гэлээ. Хохирогчийн бие хүнд сэхээнд байгаа гэсэн мэдээлэл байна. 

Мөн Ц.Цэрэнпунцагийн хүү С, “Эрэл”-ийн Б.Эрдэнэбатын хүү Т нар архи, согтууруулах ундаа хэрэглэсэн үедээ хохирогчийг гэмтээсэн нь тогтоогдсон байна. Хохирогчийн ар гэрийн зүгээс дээрх этгээдүүдийг хар тамхи хэрэглэсэн хэмээн үзэж байгаа аж. Тэд шүүх шинжилгээний хариуг хүлээж байгаа гэлээ. 

Уг хэрэг өнгөрөгч бямба гарагт буюу энэ сарын 18-19-ний шилжих шөнийн 03:30 цагийн орчимд Сүхбаатар дүүргийн 3 хорооны нутаг Хүүхдийн 100 Хаан банкны орчимд болжээ. 

Өмнө нь Ц.Цэрэнпунцагийн хүү С, “Эрэл”-ийн Б.Эрдэнэбатын хүү Т нар удаа дараа хэрэг, зөрчлөөр цагдаагийн байгууллагад шалгуулж байсан аж.