“БҮСЧИЛСЭН ХӨГЖИЛ-САНХҮҮГИЙН ЧАДАМЖ- НИЙГМИЙН БАТАЛГАА” уриан дор өнөөдөр /2025.05.02/-нд Улаанбаатар хотод зохион байгуулагдаж буй тус зөвлөгөөнд Орон сууц, барилга хот байгуулалтын сайд Ж.Батсуурь, Орон сууц нийтийн аж ахуйн удирдах газрын дарга Ч.Мэндбаяр, Ус суваг удирдах газрын дарга Ц.Төрхүү болон төрийн болон төрийн бус байгууллага, аж ахуйн нэгж, байгууллага, инженер техникийн 200 гаруй удирдах ажилтны төлөөллүүд оролцлоо.

Орон сууц, нийтийн аж ахуйн чиглэлээр төрөөс баримтлах бодлого, Бүсчилсэн хөгжлийн үзэл баримтлалд туссан төв суурин газрын нийтийн аж ахуйн инженерийн дэд бүтцийг хөгжүүлэх төсөл хөтөлбөр, салбарын санхүү эдийн засгийн өнөөгийн байдал, хүний нөөцийн хүртээмж тэдний нийгмийн баталгаа, шинээр нэвтэрч буй техник технологийн дэвшил, хууль эрхзүйн орчныг сайжруулах тулгамдсан асуудлуудыг шийдвэрлэх зорилтыг хэлэлцэв.

Орон сууц нийтийн аж ахуйн салбарт 10,600 орчим ажилтан албан хаагч ажиллаж байгаагийн 2300 нь инженер, техникийн ажилтан байна. Мэргэжлийн инженерийн эрэлт хэрэгцээ дутагдалтай байгаа асуудлыг шийдэх хангах асуудлаар салбарын яамнаас бодитой тодорхой ажлуудыг хэрэгжүүлж эхэлсэн. Тухайлбал орон сууц, чадавхжуулах сургалт хөтөлбөрүүд, сургалтын тэтгэлэг гэх мэт орон нутагт суурьших урамшууллын хөшүүлэг бий болгох замаар салбарын мэргэжилтнүүдийг тогтвор суурьшилтай ажиллуулах арга замыг судалж ажил хэрэг болгосон.

ШУТИС-ийн Барилга Архитектурын сургуульд Нийтийн аж ахуйн инженер, Ус хангамж ариутгах татуургын инженерийн сургалтад суралцах бүх хугацааны төлбөрийг дааж, гурвалсан гэрээгээр сургаж, төгсөөд ажлын байртай болох баталгаа бүхий салбарын сайдын нэрэмжит тэтгэлгийг бий болгож байна. Тус хөтөлбөр 2025-2026 оны хичээлийн шинэ жилээс эхлэн хэрэгжихээр бэлтгэл ажилдаа ороод байна.